Евро-2012 қизғин паллага кириб бораётган бир пайтда сhаmpionat.com сайти иштирокчи жамоалар бош мураббийларининг маошлари билан қизиқиб кўрди ва бир қатор ажабтовур фактларга дуч келди.
Маълум бўлишича, Михал Билекнинг моянаси Дик Адвокаатникидан 60 баравар озроқ, Славен Билич эса йилига атиги 160000 евро иш ҳақи оларкан.
«Мулла жиринг» масаласи ҳамиша ҳаётнинг энг долзарб мавзуси бўлиб келган, ҳозир ҳам шундай, келажакда ҳам муҳимлик даражаси ўзгармайди. Айниқса, ўзгаларнинг ҳамёнини титкилаш — лаззатли эрмак. Албатта, буни «эгри» маънога йўймаслик керак — шунчаки, машҳур санъаткор ва спортчиларнинг қанча топишлари, даромад миқдори қанчалик асосли эканлигини билиш ҳамма учун қизиқарли. Айтиш жоиз, эндиликда Россия терма жамоасининг собиқ устозига айланган голландиялик мутахассис Польша ва Украина майдонларида энг бойвачча мураббий мақоми билан юрди.
1. Дик Адвокаат, Россия — 7 млн. евро
Бундай ҳамён билан Дик энг кўп маош оладиган мураббийлар ўнлигида 8-ўринни банд этди. Ундан юқорироқ жойлашишга Моуриньо, Анчелотти, Гвардиола, Фергюсон, Венгер ҳамда ватандоши Гус Хиддинк муваффақ бўлишди. Гуснинг йиллик иш ҳақи 8,6 млн. еврога тенг. Терма жамоалар бош мураббийлари орасида Дик ярим йил етакчилик қилди — Фабио Капелло Англия терма жамоасини тарк этганидан кейин. Европада ҳеч ким шартнома борасида РФИ олдига тушолмайди. Адвокаатга энди ҳеч қаерда бунчалик кўп тўлашмаса керак. Зеро, унинг Англияга йўл олиши эҳтимолдан йироқ. Тўғри, ЖЧ-2022да Қатар термасига устозлик қилишни орзу қилиши мумкин.
2. Чезаре Пранделли, Италия — 3 млн. евро
Ҳозирча «Скуадро Адзурра»нинг ишлари режадагидек кетмоқда. У кутилганидан кўра, яхшироқ ўйнаяпти. Италияликлар учун Англия ўтиб бўлмас ғов эмасди. Ҳа, Чезаре ўз шогирдларини ярим финалга олиб чиқиш баробарида Евро арафасида янграган барча салбий тахминларни пучга чиқарди.